一名女子昨日（17日）到旺角荷李活商業中心一間鐘表店換手表電池，期間暗中向店主寫字條求救，表示被尾隨一名男子跟蹤，醒目店主該名男子查問，對方見事敗匆匆離去。店主其後在Instagram上發文，帖文被網民瘋傳，稱讚店主好人有好報。

　手表店在Instagram發帖公開事件：

　「話說今日有位女客人拎啲表上門市換電，由於人手有限，要等一陣先有得拎，所以請客人留低手表及聯絡，等整好之後，再通知佢上嚟取回。

　大約半個鐘，整理好晒之後，女客人上嚟門市取回。緊隨女客人身後有位灰色衫嘅男士，可以用衝住入黎舖頭黎形容，本身以為係相識，但女客人面有難色，而且女客人行到邊，灰衫男都跟到貼。本店舖面空間已經細，其間又有幾位客人係度，我哋已經覺得唔對路，分別詢問灰衫男及女客人：有咩需要？女客人終於細細聲開口話要紙同筆，最終寫咗圖入面張紙：唔好意思！我俾灰色衫男人跟蹤。

　最後，灰衫男就應該知道事敗，離開咗本店。而女客人都鬆一口氣，同我哋講返，原來灰衫男已經跟蹤女客人去咗兩間舖頭，最後仲跟到上黎本店，期間灰衫男手持電話係耳邊扮講電話，應該係偷拍。幸好最後無事，而且有另一對情侶客人幫手護送女客人離開，去安全地方。

　好彩女客人警覺性高，而且留係比較多人位置唔離開，同時又用方法通知佢俾人跟蹤。今次分享呢件事比大家知，係想各位女士提高警覺性，有事唔好怕，要出聲先幫到你！而身邊嘅人都唔好怕，可以多口問句有咩可以幫到手。

　大家都可以分享可怕經歷，亦可以提醒身邊嘅美女們小心，提高警覺。

　最最最後，麻煩晒對情侶客人幫手護送，Thank you！」

　帖文在一日內被逾萬人關注，有網民表示：「好醒目個女仔！」「多謝你地幫手！好人有好報！！」（記者區天海）

　店主在Instagram上帖文。