早前何太在抖音粉絲群發表不少「偉論」，當中有網友提起翁靜晶在YouTube頻道以法律角度分析「何伯事件」，何太即刻「焫着」，更疑似以「廢柴」批評翁靜晶，並發表質疑對方律師專業資格的言論。

翁靜晶昨日（10日）在YouTube頻道「危險人物2.0」直播中亦有批評相關言論，「有人話，翁靜晶個律師牌，有人講個牌買返嚟㗎喎！哇，我聽到好開心喎！我就問喇，有得賣嗰個人⋯⋯喺邊度有得買呀⋯⋯如果買得起，買多個都唔錯喎咁樣。」她又笑言：「講呢樣嘢嘅人都幾傻！」更分享一句成語：「夏蟲不可語冰」。

翁靜晶昨日（10日）開Live，期間提及將向何太發出第一封律師信。影片截圖

在直播尾聲，翁靜晶提到將會向何太發律師信，「呢位大媽我對佢係冇敵意嘅，我唔會仇恨佢⋯⋯我知道佢想改善生活、改善家人嘅生活」、「但我都希望佢可以攞個愛心去對人哋嘅家人小朋友。」翁又指，應該用愛心去對人，給予其他人一個機會先禮後兵，「通常我做任何嘢之前都會先禮後兵⋯⋯我會作一個措施，作一個制衡嘅措施，律師信係會出，出咗之後如果佢係好人嘅，佢行善良嘅路唔好去傷害人，好好地去對家庭入面嘅人，咁就唔會有下一着；但如果好過分嘅，去傷害其他人嘅話，我出咗第一封信，我亦都可以隨時採取第二步行動。」

何太在其抖音粉絲群中疑似連珠炮發式狂轟翁靜晶發律師信一事。網上圖片

何太其後在抖音粉絲群連珠砲發式狂轟翁靜晶出律師信一事，「放馬過來」、「你敢不敢見我」、「你憑甚麼出律師信畀我」、「當我唔善良的時候第一時間就係同你攬抄（炒）」，並斥翁靜晶「為流量不擇手段」！（李華）